Jonathan Wyatt vann Nuten Opp

Jonathan Wyatt frå New Zealand vann i år som i fjor Nuten Opp i Rosendal, med tida 36.06. Kona, Antonella Confortola, vann dameklassen, også som ifjor. To unge kenyanarar gjorde det godt: Sammy Kurui vart nr. to i herreklassen, med tida 37.06, nøyaktig eitt minutt etter rekordhaldaren på dette motbakkeløpet.

- Men eg har aldri delteke i motbakkeløp før, fortel kenyanaren, vel komen nedatt frå Malmangernuten.

Kom raskt i teten

Allereie etter eit kvarter av løpet var det klart at skulle nokon ta opp konkurransen med Wyatt og Kurui, måtte dei setja inn den ekstra reservepluggen. Resultatlista viser at ein av dei som har ein slik, er Terje Aggvin frå Varaldsøy. Han stiller for idrettslaget Gular og kom på fjerdeplass.

Før han kom Arne Post frå Oppegård, også han kom i mål med god margin før 38 minutt, medan Aggvin, etterfølgd av Thomas Vestbø frå Team Hovden tok det trettiåttetalet i bruk. Barakarunner (nettside: www.barakarunner.com), som er namnet på klubben til dei to kenyanarane, kan i tillegg til andreplassen skilta med Ezekiel Cheruriyot på sjetteplass.

To namn til skal nemnast mellom dei ti første, nummer 8 og nummer 9: I kvar sin klasse leverer Oddmund Roaldkvam frå Stord og Erlend Drivenes frå Tørvikbygd imponerande prestasjonar, den første i gruppa menn frå 50 – 59 og unge Drivenes i aldersklassen gutar 17 – 19. Så haglar det tett i tett med menn som kjem inn før femti minutt er gått, heilt ned til 28. plass. Derfor er det grunn til å nemna Mads Løkeland Slåke (48:32) på 23. plass, nummer to i klassen 17 – 19, og Thomas Netland (49:45), nummer tre i klassen 16 – 19.

Kvinner i tet

Mellom dei ti beste kvinnene stiller den italienske langrennsløparen Antonella Confortola i særklasse (43:47), saman med unge May Britt Buer frå IL Harding (44:47). Så må ein opp på 50 minutt, heller ikkje dét lang tid på det tøffe løpet frå havnivå til 890 meter. På tredjeplass kjem Miriam Berg Hovda (50:02) og på fjerde Marit Årthun frå Matre IL (50:30), med beste plassering i klassen 40 – 49 år.

Før vi har nådd titalet mellom dei kvinnelege deltakarane finn vi Margun Eik frå Rosendal på åttandeplass (56:45). Lovande prestasjonar har òg Barbro Sætha (59:01) i klasse 17 – 19 år og Louise Årthun Bergane (1:02:36) og Kristine Hovland (1:04:04) i klasse jenter 15 – 16 år.

Skodda letta

På føremiddagen var Malmangernuten innhylla i eit solid skoddeteppe, men det letta til løpet starta klokka 12. Då løparane kunne skimtast på eggen mot toppen, la skyene seg nedpå ei stund igjen, men så letta det på ny og augustsola varma godt under premieutdelinga.

Minneløp for Jon Tvedt

Ved premieutdelinga vart Jon Tvedt heidra med tonar og ord. Rekordhaldaren av Nuten Opp i sin klasse, meir kjend som Stoltzekongen i bergenstraktene, omkom under ein treningstur ved nyttårstider. Mora, Ingebjørg Tvedt, fekk æra av å premiera deltakarande i årets Nuten Opp og ein sum frå løpet er overført minnefondet som er oppretta.

Berre vane med baneløp

Neste års Nuten Opp vil bli ei tøffare utfordring for Jonathan Wyatt, for då har kenyanarane tenkt å koma igjen, og då skal dei ha trent i løypa på førehand.

- For eg er berre van med å springa på bane, fortel utfordraren Sammy Kurui, - distansane mine er 5000 og 10 000 meter, der eg har tidene 13 og 27 minutt.

- Kva seier du til at konkurransen blir tøffare til neste år? spør vi Jonathan Wyatt.

- Det er berre bra! svarar han entusiastisk.

Og til neste år har han òg tenkt å ta med kona, for dei liker seg i Rosendal. Og i løa til Jostein Hatteberg, initiativtakar til Fjellstreif og Nuten Opp. I april gifta paret seg. Til vinteren deltek Antonella i sitt fjerde OL, i Canada.

Men skigåing er ikkje noko for newzealendaren, meiner Wyatt.

Heller ikkje for kenyanarane, vil vi tru.

Publisert søndag 09. august 2009 kl. 00:00.
Sist oppdatert søndag 09. august 2009 kl. 14:35.